» » Professor Şahnaz Şahbazova Lütfi Zadənin səhhəti haqqında danışıb

Professor Şahnaz Şahbazova Lütfi Zadənin səhhəti haqqında danışıb

Müəllif: Dəyanət от 10-08-2017, 09:00
Professor Şahnaz Şahbazova Lütfi Zadənin səhhəti haqqında danışıb

Bir neçə gündür ki, Amerikada yaşayan azərbaycanlı alim Lütfi Zadənin  (ing. Lotfi Zadeh; farsca əsl adı Lütfəli Rəhim oğlu Əsgərzadə) səhhətinin pisləşməsi barədə məlumatlar yayılmaqdadı. Bu məlumatlar arasında məşhur alimin vəsiyyəti də önə çəkilir:"Məni Azərbaycanda dəfn edin” .
Dünyaşöhrətli alimin yeganə övladı Norman  Zadə Lütfəli oğlu Əsgərzadə  atasının vəziyyətinin ağır olduğunu dilə gətirsə də, alim hələ müasirimizdir və xalqımız adından ona cansağlığı arzulayırıq.
AZƏRTAC-ın bugünkü xəbərlrində Lütfizadə ilə bağlı nikbin bir yazı dərc edilmişdir: onu sizə təqdim edirik.
"Ana və Uşaq"

Lütfi Zadənin Azərbaycanda dəfn edilməsi üçün məsuliyyətli şəxs kimi ailənin yaxın dostu, Azərbaycan Texniki Universitetinin professoru Şahnaz Şahbazovaya vərəsə məktubu təqdim edilib.
Professor Şahnaz Şahbazova AZƏRTAC-a bildirib ki, məktubda həmin ağır gün gələndən sonra onun nəşinin Azərbaycanda dəfn edilməsi vəsiyyət edilir. Məktubu professor Lütfi Zadənin oğlu Norman Zadə imzalayıb. Məktubda, həmçinin professor Lütfi Zadənin bütün mükafatları, ordenləri, medalları və kitabları professor Şahbazovaya vəsiyyət edilməsi qeyd olunub.
Hazırda Berkli şəhərində çalışan professor Şahnaz Şahbazova qeyd edib ki, o, kompüter elmləri fakültəsində qısamüddətli professor vəzifəsində elmi-tədqiqat işi aparır. Lütfi Zadənin səhhəti haqqında söz açan professor deyib ki, o hər gün alimi ziyarət edir və Lütfi bəy yataqda çox olmağa üstünlük versə də, koməkçisi ilə hər gün vacib e-maillərə cavab yazır və elmi məqalə üzərində işləyir. Professor Şahbazova Lütfi Zadənin hazırda yaddaşının normal olduğunu vurğulayıb.
Dünya şöhrətli azərbaycanlı alim, qeyri-səlis çoxluqlar nəzəriyyəsinin və qeyri-səlis məntiqin banisi, Kaliforniya Universitetinin professoru Lütfi Zadə 1921-ci ilin 4 fevral tarixində Bakı şəhərində anadan olub. 1944-cü ildə Tehran universitetini elektrik mühəndisliyi ixtisası üzrə bitirib.
Lütfi Zadə 1944-cü ildən 1959-cu ilə qədər Massaçusets Texnologiya İnstitutunda və Kolumbiya Universitetində magistr, doktorluq elmi dərəcələrini alıb.1959-cu ildən Berkli Universitetində professor, 1963-cü ildən isə "Elektrik mühəndisliyi və kompüter elmləri" kafedrasına rəhbərlik edib. Hazırda L.Zadə həmin universitetdə ömürlük professor və Soft Computing İnstitutunun direktoru kimi fəaliyyət göstərir.
Onun məşhur vəziyyətlər fəzası, dinamik sistemlərin idarəolunma və müşahidəolunma nəzəriyyələri müasir idarəetmə elminin əsasını təşkil edir. ABŞ-ın Milli Kosmik Tədqiqatlar Mərkəzi (NASA) bu nəzəriyyələr əsasında idarəetmə sistemlərini tədqiq edir, layihələndirir və tətbiq edir.
L.Zadənin ən böyük nəzəriyyəsi qeyri-səlis məntiq nəzəriyyəsidir. Bu nəzəriyyə riyaziyyatın əsası olan ikili çoxluq anlayışına yeni ifadə verib: qeyri-səlis çoxluq. Elmdə qeyri-səlis ölçünün daxil edilməsi təbiətdə və cəmiyyətdə gedən proseslərin qeyri-müəyyənliyini daha adekvat nəzərə almağa imkan yaradıb.

Professor Şahnaz Şahbazova Lütfi Zadənin səhhəti haqqında danışıb

Yusif Babanlı
AZƏRTAC-ın xüsusi müxbiri
Vaşinqton
Mənbə:http://azertag.az/xeber/Professor_Sahnaz_Sahbazova_Lutfi_Zadenin_sehheti_haqqinda_danisib

Hörmətli qonaq, Şərh yazmaq üçün zəhmət olmasa hesaba daxil olun ya da Qeydiyyatdan keçin.

Şərhlər:

Şərh Yaz
İnformasiya
Qonaq qrupunda olanlar istifadəçilər bu Xəbəra şərh əlavə edə bilməz.