Mərasimdə Bakı Olimpiya Stadionunda Bakını tərənnüm edən görüntü, Avropa çempionatının kuboku və iştirakçı hər iki komandanın forması dalğalanırdı.
Artıq matç arxada qalmışdır. Uels-İsveçrə matçı gərgin mübarizə şəraitində keçsə də, ilk 45 dəqiqədə qapılar qolsuz qaldı. Yalnız matçın 49-cu dəqiqəsində İsveçrə millisinin hücumçusu Breel Embolo komandasına ilk qolun sevincini yaşatdı.
Bu qol hər iki tərəf üçün oyunu daha gərginləşdirdi: həm Uels futbolçuları, həm İsveçrə futbolçuları inamla mübarizə apardılar. Nəhayət,hücumlarının sayını artıran Uels komandasının oyundaşı Kieffer Mur 74-cü dəqiqədə sərrast zərbə ilə hesabı bərabərləşdirdi.
Matçın 85-ci dəqiqəsində İsveçrə yığmasının hücumçusu Mario Qavranoviçin Uels millisinin qapısına vurduğu qol isə videonəzarət sistemində baxıldıqdan sonra qeydə alınmadı. Oyun 1:1 hesablı heç-heçə ilə başa çatdı.
Qeyd edək ki, Avropa çempionatının 60 illik yubileyi münasibətilə AVRO-2020-nin oyunları müxtəlif ölkələrdə təşkil olunacaq. Bakı Olimpiya Stadionu A qrupu çərçivəsində iyunun 16-da Türkiyə-Uels və iyunun 20-də isə Türkiyə-İsveçrə oyunlarına da ev sahibliyi edəcək. İyulun 3-də isə Bakıda dörddəbir final mərhələsinin bir qarşılaşması olacaq.