Kütləvi informasiya vasitələrində cəmiyyətimiz üçün aktual olan məsələlərə həm statuslu şəxslər, həm də sadə insanlar tərəfindən dərhal münasibət bildirilir. Bu, çox yaxşıdır. Əgər belə münasibətlər sağlam niyyətə xidmət edərsə, həmin məsələyə faydası dəyə bilər. Ona görə də istər xalq və dövlət adından danışmaq mandatı olan şəxslər, istərsə də sadə adamlar kütləvi informasiya vasitələrində, sosial şəbəkələrdə elə danışmalıdırlar ki, dedikləri cəmiyyətdə təfriqə salmasın, narazılıq yaratmasın, qaş düzəldən yerdə gözün də birini vurub məyub etməsin, insanları əsəbiləşdirməsin. Bu baxımdan sosial şəbəkələrdə gedən bəzi yazılar bir vətəndaş olaraq hamımızı narahat edir.
Bizim əsgər və zabitlər haqqında ölçülüb biçilməmiş, həqiqəti əks etdirməyən fikirlər söyləmək doğru deyildir. Azərbaycan ordusunun müəyyən şəraitini NATO səviyyəsi ilə müqayisə etmək doğru deyildir. Azərbaycan müstəqilliyini yeni qazanıb. Bu qısa müddətdə dağıdılmış, viran edilmiş təsərrüfat sistemini bərpa edib, güclü müdafiə qabiliyyətinə malik Milli ordu formalaşdırıb. Azərbaycan Ordusu bu gün dünya miqyasında 50 ən güclü ordu sırasındadır. Azərbaycan ordusu iki əsrdən artıq davam edən işğal siyasətini, işğal olunmuş torpaqlarının 20 faizini 44 gün ərzində azad etdi. Kimsə bacara bilsəydi, bunun qarşısını alardı.Artıq Azərbaycan özü bir gücdür. Onun çox qüdrətli Lideri vardır.
Ona görə də bizim əsgər və zabitlərin vətənpərvərliyini heç vaxt kiçiltmək olmaz.
Bizim əsgər zabitlərimiz nəyə qadir olduqları ilə dünyanı, hərb tarixini elə heyrətdə qoydular ki, bu tarix hər zaman həsəd mövzusu olacaqdır.Bu fəxarətdə onların hər birinin əməyi var, qanı var.
İnternetdə hərbi çağırış yaşına çatmış erməni gənclərinin müharibədən əvvəl də öz ölkələrini tərk etmələri haqqında məlumatlar var. Hərbi hissədən qaçanlar haqqında da həmçinin. Çünki ermənilər döyüşdən əvvəl qorxmuşdular. Kimdən, əlbəttə, bizim əsgərlərdən. Bir erməni cani yazmışdı ki, onlara güllə dəyirdi, amma ölmürdülər, terminator kimi qalxıb yenidən üstümüzə gəlirdilər.
Şuşanın sıldırım qayalarını, bunlar hamısı riskli əməliyyatlar idi, məharətlə aşıb keçən əsgər və zabitlərimiz heç bir çətinlikdən qorxan oğullar deyildi.
Polad Həşimov general idi, səngərdə əsgələri ilə çiyin-çiyinə şəkilləri var. Bizim əsgər və zabitlərimiz bütün çətinlikləri bilib, qarşılaşmazdan öncə onu yenəcəklərinə tam əmin olub döyüşə atılıblar və heyrət yaradıblar. Əgər 1-2-3 nəfər hansısa söz-söhbəti edibsə, bunu ümumi şəkildə ifadə etmək doğru deyil . Belə söhbətləri arxa cəbhədə böyüdüb əsgər və zabitlərimizlə ordumuz arasında etimadsızlıq yaratmaq istəyənlər varsa, günahı bu istəkdə olanların öz boyunlarına .
Amma yazıda deyilən məqam əsgər və zabitlərimizə qətiyyən aid edilə bilməz.
Siz bizim sovet dövründən bildiyimiz qəhrəman obrazlarından da mükəmməlini və gerçəyini ortaya qoydunuz bu müharibədə.
Hamımız bilirik ki, müharibə təhlükəsi hələ var. Düşmən və əleyhdarlarımız öz içimizdəki səbatsızlardan istifadə etməklə təfriqə salmağa, əsgər və zabitlərimizlə cəmiyyət arasında olan etimadını sarsıtmağa çalışacaqlar və çalışırlar da. Onda biz də ideoloji cəbhədə daha möhkəm olmalıyıq. Ali Baş Komandan və Ordu; Ordu və Xalq; Ali Baş Komandan, Ordu və Xalq – etimadına daha çox can atmalıyıq. Buna hər kəs töhfə verməlidir, xidmət etməlidir.