Əgər  televiziyanın, mətbuatın siması belə davam edəcəksə,  hər gün elə bu telekanalların ekranlarından, mətbuat səhifələrindən insanları  məyus edən, təşvişə salan, tariximizə, kökümüzə  yaraşmayan  utanc hadisələr haqqında  hələ çox  seyr edəcəyik, hələ çox oxuyacağıq.   Əgər belə davam edəcəksə,  onda  təhsil müəssisələrində müəllimlərin  tərbiyə mövzusunda aşıladıqlarının nə əhəmiyyəti ola bilər?  Çünki müəllimin, məktəbin  öz şagirdlərində formalaşdırdığı  əxlaqı şou televiziyası, şou mətbuatı  hər gün ağına-bozuna baxmadan məhv  edir.

 Yazımızın əvvəlində qeyd etdiyimiz kimi, bizim ədəbiyyatımızı, mədəniyyətimizi, teatr və kino sənətimizi, musiqimizi, mətbuat və televiziyamızı yaradan, ona əsl sənət məfkurəsi ilə xidmət edən   görkəmli bəstəkarlar, qələm sahiblərir olub. İndi belə sənətkarların əsərlərinə nadir hallarda müraciət edirlər. Mətbuatda, televiziyada  tüğyan edən isə şou təfəkkürünə yeni impuls verən bayağı musiqilər, məzmunsuz yazılar, seriallar, şou verilişləri və  heç bir əxlaqa sığmayan fotosessiyalardır.

Müəllimin, kitabxana və muzey işçisinin,  səngərdə  torpaqlarımızı qoruyan əsgər və zabitlərin nişanı, toyu olmurmu,  onların ailəsində  uşaq doğulmurmu?  Amma  mətbuat ancaq  bir və ya iki dəfə  dəfə boşanıb guya yenidən evlənən sənətçilərin təkrar evliliklərini,  toydan sonrakı   bal ayının  təəssüratlarını əks etdirən şəkillər paylaşırlar. 

Kimdir bu sənətçilər: tez-tez efirdə, saytlarda  bir-birini təhqir edən, evlərini, maşınlarını, geyimlərini, səyahətlərini, sponsorlarını belə nümayiş etdirən məşhurlar…

Davamı var...